يوميات نعيم جرسه

صاحبنا متجرس خلاص من شعبان ما دخل ويتمنى اليوم في شعبان يبقى بسنة كامله.
جاء ماري بشارع ناس حاجة عشه شم ريحة الابري وقعد يطنطن.. عليك الله شوف الناس دي جارين للصوم جري اسا جابوا لينا رمضان تب في ابري بعوسوهو من اسا !!!!!؟؟
كورك لحاجه عشه بالحيطه يا حاجه كيفنك ردت حاجه عشه كويسين الحمد لله مالو صوتك كدا دحين كان ما اخاف الكضب انت نعيم عارفاك من يجي رمضان دا بتقعد تهلوس كدي اتفضل شيل ليك طرقة ابري ضوقا رد نعيم يا حاجه انا ريحتو دي مضايقاني كمان اشيل منو وانتوا زاتكم جبتوا لينا رمضان دا جري.....................
اها زولنا اتحرك شويه لقى الشفع بعملوا في الجوامع بتاعت الفطور نهر الشفع والله غيركم انتوا شئ تاعبنا مافي يلا برا لمه اسا انتوا بتصوموا بتقوموا تلهضموا من الصباح باقي السحور وباقي العشاء وتتجغموا في الشاي وتلحسوا في يديكم اسا رمضان دا فارزين ليهو شنو؟ يلا كل واحد على بيتو والله اشوف لي واحد لافي هنا ما اخليهو

نواااااااااااااااصل

حقوق الموضوع خاصه ب محمد نعيم

الحلــــقة الثانية

أول يوم طبعاً قام من النوم كغير عادته قام بدري التقول ببيع خضار مشى ولع نار الشاي وجاب ليهو أكبر كفتيره ( الكفتيرة دي البعملو فيها الشاي ) ملاها مويه للحلقوم وختاها فوق النار عامل فيها ناسي امو صحت من النوم وقالت:-

مالك يا جنا موقد النار ومسخن ليك موية قدر دي عايز تنضف ليك كرشة تور ولا شنو؟ ظنيتك ناسي

وعايز تعمل شاي مالك ما صائم ولا ناسي ولا متناسي؟!!!
!
رد نعيم:- كيفن يا يمه ما صايم.

الوالده:- طيب خبارك مسخن المويه

نعيم:- عايز اتبرد بيها.

الوالده :- أجي ياولدي الدنيا سخانه وعايز تسخن مويه للحمّام.

نعيم :- ممممممممم خلاص ما تحكيها كدا تعالي هنا اسا انتي المصحيك شنو بدري كدا ؟

الوالده:- كيفن المصحيني شنو انت ما عارف اني بعمل الشاي للشفع ديل.

نعيم :- يا ريت ما كبرنا ياريتنا لو بقينا متل ابو شلاضيم ديل زمان عايزين الكُبر نحك في شناباتنا علشان نقعد في صينية الغداء في الاعراس والسمايات اسا ندمنا عليها.

الوالده بطنطن مالك وبتقول في شنو؟

نعيم :- لا لا ما بقول في حاجه بس بقول ليك امبارح ما صحيتيني للسحور مالك ؟

الوالده :- ههههههههههههههههههههه والله ضحكتني انا عارفاك بتنكُر عشان كدا ما غسلت لي يدك كدي شمها وشوف باقي اللبن والفطيره في شنيباتك اليادوب قايمات ديل

الى لقاء في الحلقه القادمه انتظرونا

الحلقة الثالثة

نعيم يحكي في سرو ويقول :- انتوا عارفين امي دي مداقراني كدا على طول لكن عندي ليها خطه عجيبه كدي النحاول اونسها شويه ممكن تحن علينا.

الوالده :- يا جنا اموت واعرف بتتكلم تحت نخرينك بتقول في شنو؟

نعيم:- لا لا ما بقول في شئ

الوالده :- من الهلال دا هله انت بتتزهج وتتنفر في شنو يا حشاي

نعيم:- يمه انا عايز ادرس اعلام وابقى بتاع اخبار

الوالده :- لالالالالا الا دي بتاع اخبار وقوالات ناس الحله يقولوا علينا شنو ولدك لخباط

نعيم :- ههههههههههههههه يمه قولي خير ما بتاع لخبطه انا بتاع اخبار متل الفي الرادي والتلفزيون

الوالده :- اهاااااااااااااااااااا قصدك كدا يعني؟

نعيم :- ان شاء الله تسألني تقول لي لشنو يعني الدراسه دي بعينها

الوالده :- انت تعال كل يوم بتغير رايك قبل كدا قلت عايز تبقى دكتور وتعالج البقر والغنم بتاعتنا ديل تبقى دكتور غنم يعني

نعيم :- يمه اسمو بيطري دا.

الوالده :- اها غيرت اتجاهك لشنو؟

نعيم :- ايوه دا الكلام الصاح اسا بدردقا ليكم

الوالده :- بتقول في شنو يا جنا

نعيم :- ولا حاجه بس كنت عايز اجرب الاعلام فيك عايز اسعلك كم سعال كدا وتجاوبيني بصراحه ممكن؟

الوالده :- اها قول قولك.

نعيم :- اول سعال كدا ابوي دا شافك وين؟

الوالده :- ههههههههههههه شافني في الحدائق يعني؟ يا ولدي زمان مافي راجل بشوف ليهو واحده الا في الحواشات .

نعيم :- طيب عرفك كيف؟

الوالده مسكت نعيم من اضانو وادتو قرصه قويه وقالت:-

اسمع يا جنا زمان رجال الفريق بتلموا في ديوان جدك الكبير دا بتلموا علشان يحلوا مشاكل ناس الحله والمشاكل كلها كانت في البهايم يعني غنمك خشن فوق بلداتي وبقرك اكلن الانقاية بتاعتي وحميرك اكلن العيش وهو شرايه ولبنه.
اها انا بعمل ليهم الاكل هاك يا ملاح نعيميه وهاك يا ملاح الويكاب داك يا ملاح ام تكشو وديك يالعصيده وديك يالقراصه الما خمج و....................

نعيم:- شفتوا كيف ما قلت ليكم بوقعها ليكم في الخيّه

وتواصل ام نعيم في حديثها الشيق بالنسبه لنعيم ودا هو قصدو انها تتكلم في الاكل. وشفت يا جنا بعد الرجال ما ياكلوا ويتمطقوا ويلحسوا اصابعيهم بجيب ليهم الشاي المنعنع واعمل ليهم ديك يالجبنه الما خمج تشم ريحتها من بداية الفريق.

نعيم :- يمه اختصري خلاص ريقي نشف تب جوعتينا اختصري وقولي عرفك كيف انتي البتعملي الاكل والجبنه .

الوالده:- متل ما الرجال بتلموا في ديوان جدك برضو النسوان بجونا هنا يساعدونا ومن بينهم عمتك النجيضه دي شايفاها بتعاين لي ساي وانا مقرقبه ( يعني رابطه التوب وسطها ) مشت قالت لمحمد ابوك اها اكل الناس ديل عجبك ابوك طبعاً ما صدق قال ليها ياريت لو كل يوم في مشكله في الحله علشان نمشي ديون شيخ الحله ونضوق اكل مرتو عمتك قالت ليهو دا ما اكل مرتو دا اكل بتو ( بنتو ) ابوك قال ليها بتو مرت حاج الخضر عمتك قالت ليهو لالالالا دي البت الفته ( يعني الما متزوجه ) ابوك قال لعمتك طيب ما تخطبيها لي مادام انها فراكه ( طباخه ) ومن اليوم داك خطبوني لابوك وتاني يوم كان العقد على طول

نعيم :- يعني ما كسر ليك تلج

الوالده :- الزمن داك ما كانت في تلاجات المويه بنكبها في الصينيه ونرفعها فوق راس التكل لما تبرد

نعيم في سرو ويضحك والله امي دي ما عرفت التلج القاصدو انا لكن خليها تستمر لي في كلام الاكل والشراب علشان ارتاح شويه
نعيم :- اها تمي لي الحكايه.

الوالده:- كدي خليها بتمها ليك وقت تاني ماشه اعمل اكل للشفع ديل خلاص جاعو.

خليكم متابعين اليويميات علشان نشوف نعيم قصدو شنو من الحوار الطويل دا

الى اللقاء في الحلقه القادمه

والله يا محمد نعبم إلا نجيب آخر القصه دي

علقتنا والله في الاجواء ، انا لا لاحق سماء ، لا لاحق ارض

دمت لنا يا غالي

الحلقة الرابعة

نعيم يهمس ويقول :- بالله عليكم امي دي من جبت ليها سيرة العرس وذكرتها طفشت مني لكن ما بخليها الليله , اليوم دا مولع نار لازم اكسر الوقت لو ما عملت كدا ما ظنيت بكمل اليوم دا.

نعيم :- يمه يمه وين مشيتي خليتيني بين التقليه وام تكشو وطعمهن العجيب دا وخليتيني اشم في ريحة القهوة والشاي عليك الله تعالي الحقيني جري وجيبي معاك شوية موية كبيها لي في كرعيني ديل كرعيني مولعات حطب فرن بس والراس يسوي وج وج وج متل طاحونة ود الفكي والبطن تسوي بقبقبقبق كفتيرة شاي بس وشوفي قميصي اتملأ عرق متل ورقة الباسطه ويدي ترجف التقول كستر بااااااااارد في تلاجه وريقي نشف التقول باقي ملاح روب بايت في حلة.............................

الوالده :- يا جنا انت جنيت وال شنو سامعاك لكن محيرني كلامك دا كلو في الاكل والشراب حيرتني عديل كدا الكلام دا جبتو من وين ما شفت اولاد جيرانا ديل حصل سمعت ليهم جرسه متل دي حصل سمعت ليهم كواريك مالك يا ولد داير تجنني .

نعيم :- يمه خلاص بسكت لكن تعالي تمي لي الحكاية بتاعت العرس حقكم الزماااااان.

الوالده :- اخوانك ديل مشكلين في الاكل قالوا اكل امبارح ما عايزنو

نعيم :- والاكل بتاع امبارح كان شنو ؟

الوالده :- سلطة روب و..........
نعيم في اللحظه دي وقدر باقي الريق الفيهو بقى لعابو نااااااازل ومتابع كلام امو ويقول اها وتاني؟

الوالده :-وباقي الدمعة بتاعت العشاء و..........

نعيم:- والله يا يمه الدمعة دي لما تبيت للصباح بتبقى حاجه عجيبه اها وتاني

الوالده :- يا ولد ما تقاطعني

نعيم :- لكن ما بقدر اسكت ساي وانتي بتتكلمي في الاكل اها خلاص واصلي

الوالده :- خلاص ما بكمل ليك انا ماشه

نعيم :- عليك الله ورسول مكه تكملي لي احلفك بشنو تجي يمااااااااااااااااااااا والله ما تجي اقوم افطر اسا دي

اها في الحلقة الجاية نشوف نعيم دا حيفطر ولا حيواصل خليكم معانا

الى لقااء في الحلقة القادمة

الحلقة الخامسه

في نهاية الحلقة السابقه كان هذا الموقف................
نعيم :- عليك الله ورسول مكه تكملي لي احلفك بشنو تجي يمااااااااااااااااااااا والله ما تجي اقوم افطر اسا دي

الوالده :- خلاص جاياك لو ما جيتك بتفطر وتقول امي السبب اها يا جنا داير شنو وراي حاجات كتيره دايره اعملها

نعيم :- ما عايز حاجه بس تمي لي القصه بتاعت الزواج.

الوالده :- اها وقفنا وين

نعيم :- وقفنا في الاكل اقصد الغداء اقصد العقد اها في العقد جوكم كم صينيه؟

الوالده :- يا جنا انت جنيت صينية بتاعت شنو انا دكان عدة

نعيم : هههههههههههه ما فهمتيني يا حاجه قصدي طلعتوا كم صينية اكل وبعدد الصواني بعرف كم راجل جوكم للعقد

الوالده :- والله قصتك قصة مع بطنك دي اسا من الصباح بتلف وتدور عشان تجيب لينا سيرة الاكل.

الوالده :- خليك من العدد قولي ضبحتوا كم تور وكم ناقه؟

نعيم يهمس والله الحكاية جابت تيران وابل الظاهر ببل شوقي تب الليله.

نعيم :- اها اها ضبحتوا كم ؟

الوالده :- جدك طبعاً كان شيخ الحله وزعيم قبيلة تعال شوف الناس الجات للعقد من الشرق الهول والشرق والسافل والصعيد.

نعيم :- كدي دقيقه شنو الهول والسافل والصعيد ديل.

الوالده:- الهول معناها الغرب والسافل الشمال والصعيد الجنوب.

نعيم :- طيب الناس العزمتوهم ديل عملتوا ليهم مسج ولا مسكولات ولا مسنجر؟

الوالده:- يا ولدي الاكلات الجديده دي زمان ما بنعرفها لكن جيهناهم تمام ولي يوم الليله الناس بتحكي بعرسي.

نعيم :- عارف الكلام دا كلو لكن دا ما هدفي القاصدو كدي وريني عملوا شنو في الفطور والغداء والعشاء وتاني يوم الفطور والغداء والعشاء وتالت يوم الفطور و...............................................
الوالده :- يا ولد انت بالع ليك رادي خلاص سمعت وفهمت خلاص بحكي ليك لاني عرافه عجينتك.

نعيم :- عجينتي ؟!!! عجينة قراصه ولا لقمه ولا فطيره ولا طعمية ولا لقيمات ولا ........................

الوالده تسمع في ولدها ومحتاره لكن خايفه تبعد منو يقوم يتجرس اكتر علشان كدا صابره عليهو سااااااي واصرت الا تكمل ليهو القصه وتديهو الحاجه العايزها.

الوالده :- اول شئ جابوا الخدار بالكارو اليوم جت ينقلوا فيهو

نعيم : اها الخضار فيهو شنو بقدونس وكوسه وخيار و.....................

الوالده :- ياجنا بسم الله ما عارفاك بتقول في شنو لكن اول شئ الخدره والبامية والاسود والبامبي والقرع وكم شوال ويكه.

نعيم :- كم شوال ويكه اصلو عندكم معسكر؟

الوالده :- هههههههههههههههه يا ولدي انت قايل شوال الويكه ياهو الكبير دا ؟ شوال الويكه لما الحاجات يدقو ببقى قدر الكيس الصغير دا.

نعيم :- طيب اللحم عملتوا شاورما ولا اوصال؟

الوالده :- انا ما فاهماك لكن اللحم عملناهو للملحات والباقي عملناهو سلات..........وقطعت حديثها لانها اتذكرت الحلة فوق النار .......... اجر يا نعيم شوف لي الملاح الفي النار دا ما يكون حرق امشي وتعال اكمل ليك الحكايه

الى لقاء في الحلقة القامه

اليكم معاني بعض الكلمات التي قالتها والدة نعيم

يا جنا : يا ولد ومنها يا جناي يعني يا ولدي

عدة : أواني

الخدار : الخضار

الكارو : عربة يجرها الحصان

سلات: لحمة ناشفه [/size]

[size=18]

الحلقة السادسه

في نهاية الحلقة السابقة كان هذا الموقف...............................

الوالده :- انا ما فاهماك لكن اللحم عملناهو للملحات والباقي عملناهو سلات..........وقطعت حديثها لانها

اتذكرت الحلة فوق النار .......... اجر يا نعيم شوف لي الملاح الفي النار دا ما يكون حرق امشي وتعال

اكمل ليك الحكايه

الوالده :- ياربي الجنا مالو اتاخر كدا يا نعيم اها الحصل شنو الحلة حرقت ولا المويه نقصت شويه كان

ناقصه تمها ولو النار عاليه نقصها شويه ولو ناقصه تمها فحم واوعا تضوق الملاح عارفاك شليق

وفهمك في بطنك يا جنا هووووووووي ياجنا يانعييييييييييييييييييييييم ياربي مالو يا ولد رد ..............

نعيم فتح الحلة وبدأ يتكلم مع الحله وما شغال بكلام امو ياااااااااااااااااه ما اجمل صوت الملاح وهو فاير

ياااااااه ما اروع الريحه ياربي الحله دي فيها كم لحمه كدي النحسب واحد اتنين تلاته دا شنو دا كل ما

احسب بتلخبط الحله فايره فوران عجيب ياريتها تفور لي كدي في بطني انا داير اعد اللحمات الجوه ديل

اشوف فيهم كم عضم وبعد شويه ارجع احسب من جديد ممكن اخواني ديل يعقبوني وينشلوا اللحمات ديل

وبعدين ما القى لي حاجه. انا شاكي العضم الكبير دا بياكل اخوانو ديل .

الوالده :- سجمي سجمي الود جنا خلاص بتكلم مع الحله يا جنا ها مالك جنيت بتتكلم مع الحله كمان؟

نعيم : اكلتيني عضمتيني اقصد خلعتيني .. ايوه بتكلم معاها انتي قاصداني

عديل كدا زمان ما بتسويها مدنكله كدا اسا عارفاني صايم وبرضو زمان كان الحله حرقت عديل ما

بترسليني اسا الجاك شنو ؟ يمه انا مارق الشارع بمشي اتونس شويه وبرجع.

الوالده :- ما تطلع تعال راجع لاخوانك ديل شكلهم بطلعوا متلك

نعيم :- حاضر . تعالوا يا جنيات جيبوا الورق وتعالوا يا سلام الورق على وزن ملاح ورق والله كلمه

حلوه شديد.

اخوان نعيم :- يلا ابدأ لينا بالحساب اصلو ست هدى مقطعه لينا جضيماتنا ديل كل يوم بتجضمنا وبتقول

لينا جضيماتكم دي منفخه بتاكلو شنو ؟

نعيم في سرو .... والله صدقت جضومك دي متل الزول الراكب ليهو جمالي مره طالعه ومره نازله انا

بتخيل لي لما ننوم وننسى السحور بتكونوا مبسوطين شديد

نعيم :- يلا نبدأ ليكم بمادة الحساب ( الرياضيات ) كل واحد يجهز الكراس بتاعو ومن اسا ما عندي فسحه

بجرها ليكم كدا ساعه ساعتين تلاته الليله تصوموا كدا بس. يلا استعدوا..................................................
]يا ترى هل نعيم حيدرس اخوانه بالطريقه المعروفه خليكم متابعين
الى لقاء في الحلقة القادمه[/size][/size][/size]

الله عليك يا استاذنا كمل ومعاك للآخر....
تصدق .... اول مرة اشوف لي جرسه بالكل ده ... وبعدين نعيم ده من كلامو سااااي فطر........

الحلقة السابعه

في نهاية الحلقة السابقة كان هذا الموقف........................ .......
نعيم :- يلا نبدأ ليكم بمادة الحساب ( الرياضيات ) كل واحد يجهز الكراس بتاعو ومن اسا ما عندي فسحه

بجرها ليكم كدا ساعه ساعتين تلاته الليله تصوموا كدا بس. يلا استعدوا................

نعيم :- يلا يا ولاد تعالوا بي جاي ...لا ما هنا بي جاي

اخوان نعيم :- هنا كويس بي هناك السخانه خلينا جنب الباب.

نعيم :- لكلكلك اخليكم بي هنا وانا بدرسكم ساي كدا انا بقعدكم بي جاي علشان اقابل الباب بتاع المطبخ ..تعالوا تجيكم الجات لعتود التاية.

اخوان نعيم بصوت واحد :- ومالو عتود التاية؟؟؟؟؟؟؟؟؟؟؟؟؟؟

نعيم:- هههههههههههههههههه والله عتود التاية دا قصتو عجيبه ..طبعاً راجل التاية دا راجل كريم كل يوم معاهو ضيوف وكل يوم ولا يومين الراجل ضابح من غنم التاية اها الضيوف جوا لعمكم دا وقابلهم ببشاشه ما متل ناس الزمن .

اخوان نعيم :- وناس الزمن ديل كعبين يعني؟

نعيم :- انا ما قلت كعبين لكن دا الواحد يصر ليك كد ويحمر ليك متل شيّة الجمر لما ترجع عشرين خطوه للخلف ويقعد يفكر طوالي قبل ما يرحب بالناس ياربي الولية عندها دقيق ولا ما عندها ياربي الكسره دي بتقضي ولا اشحد من الجيران.

اخوان نعيم :- خليك من ناس اسا كدي ورينا قصة عتود التاية دا.

نعيم يهمهم اخواني بعرفهم كويس شكلهم بعدين بطلعوا متلي جبنا سيرة الاكل والضبيحه طوالي نسوا القرايه.

نعيم:- اها لما الضيوف جوا لعمكم دا رحب بيهم ترحيب مولع نار واوريكم الحوار بتاعهم.

راجل التاية :- حبابكم الف ما ينقص ولا حرف حبابكم ميه بكل حسن نيه حبابكم عشره بلا كشره حرّم تخشوا لي جوه الليله ضابح ليكم ضابح ليكم

الضيوف:- عارفنك رجل كرم وجود لكن ما تضبح لينا عشينا بالموجود ياحاج نحن قبل اسبوع ضبحت لينا وقبل كم يوم برضو ضبحت لينا والليله كمان بتضبح؟

راجل التاية :- انا قلت وحلفت والموضوع انتهى وقعد ينده للتاية يا ولية جيبي العتود دا

التاية متحسره :- والله يا راجل دا آخر عتود خليهو بعمل ليهم عصيده بي لبن والريكة مليانه كسره خلي العتود ما تضبحوا.

عمنا اصر يضبح العتود وفعلاً ضبح العتود وجابوا للضيوف طبعاً الضيوف سمعوا حاجة التاية قالت انو دا اخر عتود اها الضيوف ديل وقعوا في العتود ما خلوا فيهو ولا حاجه حتى الاضالفين اكلوها وقالوا عايزن النيفه كمان وطلبوا من عمكم يديهم الجلد يعملوهو مصلايه.

هنا اخوان نعيم خافوا من دعوة نعيم لما قال ليهم تعالوا تجيكم الجات لعتود التايه.. سمعوا الكلام وطوالي جوا بالجانب التاني وتركوا الباب لنعيم ليشم الريحة الجايه من المطبخ.

نعيم :- مالكم سكتوا وخفتوا كدا خايفين تبقوا متل العتود دا ؟؟؟ يلا استعدوا للحصه ونبدأ ليكم بالحساب الحصبة الترقدكم الكرنتينه

]يا ترى نعيم دا بعرف يدرس اخوانو ولا عايز يضيع زمن الصيام بس

الا لقاء في الحلقة القادمة[/size][/size]

الحلقة الثامنة

في نهاية الحلقة السابقة كان هذا الموقف........................ .......

نعيم :- مالكم سكتوا وخفتوا كدا خايفين تبقوا متل العتود دا ؟؟؟ يلا استعدوا للحصه ونبدأ ليكم بالحساب الحصبة الترقدكم الكرنتينه

في اللحظه دي ام نعيم جات داخله ولقت لعاب الاولاد سايل ونعيم فاتح خشمو ومبتسم لان طعم قصة عتود التاية لسا في لسانو وقالت للاولاد:- مالكم بتتبسموا الحاصل عليكم شنو ؟ خلاص اخوكم فهمكم؟

واحد من الاخوان:- يمه والله دا ما يفهمنا ولا حاجه من قبيل فاتح لينا موضوع عتود التاية من المراره والشية والكمونية الى الاضالفين لو شفتيهو داير ياكل لي الجلاد بتاع كراسي لو ما مسكتو منو كان قام بيهو جت.

الوالده :- يا نعيم انا احترت فيك يا ولدي خليك عاقل كلها ايام وتتعدى ما تتجرس كدا زمان كنا اصغر منك وبنصوم وزمان لافي تلاجات ولا في مراوح بنبل الخيشمه بالمويه ونتغطى بيها لو جاء رمضان متل زمان ما اظنك بتصوم ليك دقيقه لكن ناس الزمن ديل الله يكون في عونهم ما بستحملوا ولا حاجه كدي قوم واصل لاخوانك ديل لو ما بتقدر بوديهم لت الرضية بت راسيه وشاطره وفاهمه.

نعيم :- خلاص يمه بواصل ليهم . يلا يا شفع تعالوا نبدأ ليكم بجداول الضرب .جول اتنين كلكم اكتبوا معاي
اتنين في واحد بتساوي اتنين اتنين في اتنين بتساوي اربعه .

الاخوان :- ما تجر بينا كدا فهمنا واحده واحده اسا اتنين في واحد دي ما فهمناها.

نعيم :- طيب افهمكم كيف؟ افهمكم كيف؟ افرض انتو اتنتين وجبنا لينا عيش وكل واحد اديناهو عيشتين ياكلن الواحد بكون اكل كم عيشه.

الاخوان :- بكون اكل اربعه عيشات.

نعيم :- انتوا بتفهموا كيف ما قلت ليكم كلكم قلت الواحد بس.

الاخوان :- آي الواحد بكون اكل اربعه عيشات.

نعيم :- والله مخكم دا اتقل من ملاح الويكاب انتوا بتفهموا كيف اي واحد اديناهو عيشتين تقولوا اربعه كيف دي بتحسبوها.

الاخوان :- موش قلت اي واحد بكون اكل كم خلاص نحن فطرنا بعيشتين واسا انت ادينا عيشتين بنكون اكلنا كم كدا موش اربعه؟

نعيم :- اها انتوا اكلتوا الصباح كل واحد عيشتين ما شاء الله عليكم يعني تاني لو داير ادرسكم الا مع الريق والله فهمكم غريب .يا يمه تعالي سوقي اولادك ديل ديل ما بشبعوا قصدي ما بفهموا وبالطريقه دي بقوم افطر لي بواحد فيهم. انا ماشي لخالتي اتونس معاها شويه .

الوالده :- يا نعيم تعال ما تمش لخالتك لانها تعبانه وعيانه انت بتذيد ليها الضغط بتاعها تعال ما تمش تعال يا جنا اسمع الكلام لو مشيت بلحقك .

نعيم :- والله خالتي عيانه اذن بتكون فاطره كدي النمشي عليها

الى لقاء في الحلقة القادمه مع نعيم وخالته انتظرونا[/size]

الحلقة التاسعة

في نهاية الحلقة السابقة كان هذا الموقف........................ .......

الوالده :- يا نعيم تعال ما تمش لخالتك لانها تعبانه وعيانه انت بتذيد ليها الضغط بتاعها تعال ما تمش تعال يا جنا اسمع الكلام لو مشيت بلحقك .

نعيم :- والله خالتي عيانه اذن بتكون فاطره كدي النمشي عليها

نعيم في طريقو لخالتو مرّ بدكان حاج علي سلم عليه وقال:- كيفك يا حاج على كيف صحتك مع رمضان

حاج علي:- وعليكم السلام اتفضل يا ولد مالك طولت مننا كدا قبل زمضان كملت الدكان كلو ما خليت طحنية وما خليت بسكويت كملت علينا البضاعه كلها حتى الهنابيك ما خليتها اسا اختفيت نهائي .

نعيم :- شنو يا حاج فاتح فينا كدا وشنو اتفضلو في رمضان دي الايام العاديه ما بتقول اتفضل اسا اتفضل على البرش دا طيب خليها لبعد المغرب قول لي اتفضل والله ياحاج شايفك بقيت كريم على المستحيلات.

حاج علي :- كيفن يعني ما فاهم حاجه

نعيم :- قبل رمضان شايفك عزمت حاج الخدر دا على شية باقيلك الخدر عندو ليك سنون وحاجة الرضية لما جات تشتري ويكه منك شايفك عزمتها على فنجان جبنه الكنت بتشرب فيها وعارفها عندها السكري غايتو يا حاج انت بتاع حركات لكن حقو الواحد يلبد ليك ولما تعزمو يفطر طوالي .

حاج على :- الكلام دا الليلة جبتو من وين ؟

نعيم :- زعلتني عزومتك الما ليها داعي اها رمضان دا ما قاعد لينا كلها كم يوم وبمشي خليك كريم كدا على طول انا خايفك بكره تقوم تتلون.

حاج علي :- والله يا نعيم من زمان انت ولد شاطر وولد مهذب وبتحترم الناس لكن سامع ناس الفريق قالوا من رمضان خش علينا انت بقيت كعب وبتفتش في المشاكل اسا حاجه عشه دي مالك عليها قالت في شعبان عزمتك تضوق الابري سمعهتها كلام عمرها ما سمعتو والشفع البعملوا في الجوامع ديل قالوا فلقت ود نفيسه في صنقورو

نعيم:- انت سمعت الشافع بكورك لشنو ما جيت فكيتو مني؟

حاج علي:- والله انا قلت الشفع ديل بتاعين حركات مرات بكوركو لما امشي افكهم بلعبوا علي ويجوا مهاجمين الدكان ما يخلو حاجه عشان كدا قلت يمكن دي خطه منكم وعملت نايم.

نعيم :- يلا يا حاج بجيك بعد المغرب اسا انا مستعجل ماشي لخالتي .

حاج علي :- سلم عليها قالوا تعبانه شويه شايف الولد هيلا شال ليها روب الصباح.

نعيم :- شال ليها روب يهووووووووووووووووووووووووووووووووووووووووو

طبعاً نعيم ما صدق انو خالتو شالو ليها روب مسك نعلاتو في يدو ومسك العراقي بي خشمو وعلى طول على خالته ربنا يكون في عونها......خليكم متابعين

الى لقاء في الحلقة القادمه[/size]

[size=6]

في نهاية الحلقة السابقة كان هذا الموقف........................ .......

نعيم :- يلا يا حاج بجيك بعد المغرب اسا انا مستعجل ماشي لخالتي .

حاج علي :- سلم عليها قالوا تعبانه شويه شايف الولد هيلا شال ليها روب الصباح.

نعيم :- شال ليها روب يهوووووووووووووووووووووووووووو ووووووووووووو

طبعاً نعيم في اعتقاده كل واحد مريض لازم يكون فاطر بدأ يتكلم مع نفسو:-- اسي لو جاتني ملاريا ما احسن؟ لالالالالالا ملاريا فيها الحقن واحتمال اسبتاليه طيب اكسر كراعي لالالالالالا كان كراعي اتكسرت ما بقدر اجري مع اخواني لما ابوي يجي من السوق ويقلعوا منو العيش والعُنكوليب اهااااااا اقول ليهم عندي نزله برضو لالالالالا امي بتسقيني القرض اقوليك حاجه يا ولد يا نعيم احسن ليك صيامك دا كدي النخش على خالتي واشوفها فاطره لكن دي ما بتفطر قدامي كدي النقوم اجيب ليها كم تأليفه كدا علشان تعترف.

نعيم :- يا خاله السلام عليكم يا ناس الهنا يا خاله خالتي وينك ياربي مشت وين اهاااااااااااا تلقاها مدسيه تتجغم في الروب . احم احم احم احم انا هنا عييييييييييييييييييييك. ياربي الخاله دي مشت وين؟

الخاله :- اتفضل خش .

نعيم:- وين كنتي مدسيّه عارفك كنتي بتعملي في شنو ؟

الخاله :- اها يا ابو العريف وريني كنت بعمل في شنو؟

نعيم :- كدي في الاول اقوم اطايبها وبعدين ارمي ليها كم تاليفه كدا.

الخاله :- بتقول في شنو؟

نعيم :- ولا حاجه بس بسالك كيف صحتك ان شاء الله كويسه؟ وكيف رمضان معاك ان شاء الله تكوني ما تعبتي فيهو كتير.

الخاله :- والله الحمد لله بس شوية تعب وانت عارف عندي الضغط تاعبني شديد

نعيم :- لكن الضغط ما بفطر.

الخاله :- والقال ليك فاطره منو؟

نعيم :- يضاهي في الكلام كدي النسعلك اولادك كيف كلهم كويسين الصايم منو والفاطر منو ؟

الخاله :- كلهم الحمد لله صايمين الا الولد الصغير من بدا رمضان ببكي قال عايز يصوم وانا منعتو لانو صغير انت عارفو قدر اخوانك اسا اخوانك صايمين؟

نعيم :- والله اخواني كان صاموا اقتصاد البلد إتصلح لكن تقولي شنو تاعبين ابوي تعب شديد يشيل وينقل وامي توقد من الصباح في الكوانين.اها قلتي لي كيف تلاجتكم ان شاء الله بتبرد وكيف الزير بتاعكم وغنمايتك بتسقيها وبتاكليها ؟

الخاله :- يا ولد كدي جر نفسك شويه واقعد في بطن العنقريب دا وبعدين اهرج شكلك جالد اليوم دا وما صايم صاح؟

نعيم :- والله الفاطرين ظاهرين والله لو شفتو الحوش نضيف تقول بنت ماشه لي حفله الخاله دي كان ما فاطره بتنضف كدا لشنو الدنيا عيد اصلو .احسن حاجه اوريها عديل كدا باني عارفها فاطره كدي يا ولد ما تتسرع .
الخاله اتمحنت وتسمع في نعيم وهو يتكلم مع نفسو لكن ما فاهمه حاجه

الخاله :- يا نعيم عايزه ارسلك الدكان.

نعيم :- لي روب ولا شنو الروب الجابو ليك الصباح خلاص كمل؟

الخاله :- لا ما روب عايزاك تجيب لي سكر

نعيم :- لكن الروب بالسكر ما كويس يا حلاتو لو عملتيهو بالشطه والملح حاجه ما تخلص.

الخاله :- انت بتقول في شنو سكر وملح وشطه الدنيا رمضان يا ولد والناس صايمن ما تجيب سيرة الاكل بالنهار.

نعيم بحاول يوقع خالته علشان يعرف هل هي صايمه ولا فاطره على حسب المعلومة الاداها ليهو حاج علي بتاع الدكان نشوف نعيم هل حيقدر يكتشف المعلومه خليكم متابعين

الى لقاء في الحلقة القادمة
[/size]

الحلقـــــــــــ11ـــــــــــــــــــــــــة

في نهاية الحلقة السابقة كان هذا الموقف........................ .......

نعيم :- لكن الروب بالسكر ما كويس يا حلاتو لو عملتيهو بالشطه والملح حاجه ما تخلص.

الخاله :- انت بتقول في شنو سكر وملح وشطه الدنيا رمضان يا ولد والناس صايمن ما تجيب سيرة الاكل بالنهار.

نعيم بحاول يوقع خالته علشان يعرف هل هي صايمه ولا فاطره على حسب المعلومة الاداها ليهو حاج علي بتاع الدكان نشوف نعيم هل حيقدر يكتشف المعلومه خليكم متابعين

نعيم الكلام دا كلو ما راكب ليهو في راسو يعني ما مقتنع قال احسن يسمع كلام الخاله ويمشي ليها الدكان ويجي بسرعه لكن قال انا خايف تكون دي تزويغه علشان تتم باقي الروب لكن انا اشطر منها انا الكِيك الاكل بلاد ابو فريك انا الاكلو تفّوا انا للضرس عرديب انا جبار الكسور انا الما بخلي بت عمي تبور انا ضواي الليل انا البعدل الميل انا الحارس الفريق انا البمرق الغريق انا البعدل المايل وانا لممام الهمايل هع هع هع ابشروا الليلة جايب ليكم خبرها.

نعيم :- خلاص يا خاله انا بمشي وبجي مع السلامه خلي بالك من الروب.

الخاله :- والله الولد وراهو سر من جا داخل بتكلم بالروب .

نعيم هنا جاء راجع اسمعي يا خاله قلتي سكر ولا ملح؟

الخاله :- سكر السكري الإرميك في الشوك

نعيم جا راجع تاني اها قلت لي احمر ولا ابيض

الخاله :- ابيض الابيض اليكون ليك اخر لبس ( قاصده الكفن )

نعيم رجع تاني :- كم رطل

الخاله :- نص. نص دسته عقارب ان شاء الله

نعيم رجع تاني في ورق ولا كيس

الخاله:- في كيس . كيس دم بركة رمضان دا.

كل هذه الحركات من نعيم عايز يشوف هل خالتو بتوزع فيهو

نعيم :- اسمعي يا خاله من دكان حاج علي ولا دكان الضو؟

الخاله :- من الواق الواق يا جنا جيبو من اي مكان يلا اسرع .

نعيم :- احسن يا ولد امشي لحاج علي الزول دا بتاع خبورات اخبار الحله كلها عندو النمشي القى لي كضم كضمين واجي واخليها براحتها .

نعيم وصل دكان حاج علي سلم على الحاج وقال ليهو شنو يا حاج انت الظاهر وزعتني مشيت لخالتي لقيتها صايمه انت لشنو قلت لي فاطره عندك اثبات ولا بترمي الناس ساي ؟

حاج علي :- يا ولدي انا لي عشرين سنة في الدكان دا وعارف ناس الحله كويس انت عارف انا عرفت كيف؟

نعيم :- اها قول

حاج علي:- شفت البشيلو مني الروب بالصباح بكونوا عايزين يفطروا بيهو لان الروب ما بتكشف يعني لو الواحده اتقبضت بتقول عايزه تعملو ملاح والبياخدوا الروب بالعصر بكونوا عايزينوا للملاح فهمت يا ابو اضنين.

قطعت كلامهم بت الرضية دايره ليها حاجات من الدكان وقالت لحاج علي :- امي الرضيه بتقول ليك اديها ربع رطل زيت وربع رطل سكر واديها بصلات باقل سعر وقيد الحساب ليوم الحساب.

حاج علي :- هوي يا بت قولي لامك الحساب كتر خلاص وانا بعد كدا ما بصبر الدكان خلاص رفوفو عشعش فيهن القمري .

بت الرضيه :- عليك الله دا دكان ما شفت دكان الضو كل شئ فيهو.

حاج علي قلع منها الحاجات وقال ليها امشي للضو خليهو يدينكم المتلك انتي ما بجي بدكانو نهائي يلا امشي

نعيم :- لا يا حاج الناس ديل مساكين وبعدين البت جاهله ناديها الله يخليك لاولادك ويخليك لينا بعد المغرب علشان العزومة العازمني ليها.

حاج علي :- خلاص تعالي يا شافعه شيلي الحاجات دي.

نعيم :- عليك الله يا حاج دي بت الرضيه؟

حاج علي :- بالحيل يا ولدي.

نعيم :- ومالا بقت ضعيفه كدا ما بتاكل ولا عيانه

حاج علي :- ديل غير ملاح ام شعيفه ما عندهم حاجه ما قلت ليك يا ولدي انا عارف الحله كلها وعارف اسرار الحله جت.

نعيم :- اها قول لي البشتروا منك كتير ناس منو

حاج علي :- يا جنا انت خالتك موش رسلتك؟

نعيم :- خليها تاخد راحتها لما تتاكد اني متاخر وبعدين امشي اداهما ليكم.

نواصل في الحلقة القادمة

الحلقــــــــــ12ــــــــة

]في نهاية الحلقة السابقة كان هذا الموقف........................ .......

نعيم :- اها قول لي البشتروا منك كتير ناس منو

حاج علي :- يا جنا انت خالتك موش رسلتك؟

نعيم :- خليها تاخد راحتها لما تتاكد اني متاخر وبعدين امشي اداهما ليكم.

نعيم بحاول يقنع حاج علي علشان يكشف ليهو اسرار ناس الحله علشان يمشي يكاوي اولادهم يعني متل البشيلو بالدين والبياكلو عمكم حاج علي وينكروا الديون .

نعيم :- اها يا حاج عليك الله تم لي حكاوي واسرار ناس الحله.

حاج علي :- كويس بتم ليك لاني ممغوس وقلبي موجعني يا جنا

نعيم :- عليك الله مالك قول ساي سرك في بير.

حاج علي :- والله عارفك بكرة بتفتني لكن ما عندي حد اشكي ليهو كلهم صايمين وزهجانين.

نعيم :- اها قول

حاج علي :- لو شفت عمن اول ( السنة الفاتت ) الدنيا خريف والمطر والرعد والبرق القبلي كل البيوت صبن الا دكاني القدامك دا جيت افقد الدكان لقيتو ما شاء الله كل شئ في محلو الا الدفتر لقيتو بقى رغيف في سليقه.
نعيم :- وليه الدفتر وحدو

حاج علي:- ما قلت ليك انت ذكي ما بتفهم الدفتر لاني مقيد فيهو الحسابات والجروره بتاعت الناس .

نعيم :- اها وعرفت العمل الكلام دا منو.

حاج علي :- والله انا شاكي في الجنا الاسمو جنكل دا بجر مني السجاير لكن ما تكلم زول اها بعد المطرة انتهت جيت لقيت درب كرعين طوال الظاهر حقاتو.

نعيم :- ولشنو ما يكون واحد غيرو.

حاج علي :- والله يا جني في نفس اليوم جاني وقال لي حسابك كم يا حاج قلت ليهو انت متذكر قال ما متذكر ولا حاجه .

نعيم :- طيب حاسبتو كيف .

حاج علي :- والله خمنت ليهو بس وقلت ليهو العفو والعافيه .

قطع الحوار الشيق بالنسبة لنعيم ود ام زين جاي عايز بيبسي وطبعا بتمتم (بقطع في الكلام)

ود ام زين:- قققققققققققالت ليك امممممممممممممممي اددددددددددددينا بيبيبيبيبيسي

نعيم :- مالك يا خوي قربت تدور وتبقى لينا لوري قول عديل

ود ام زين :- مممممممممممممما بققققققققول اااااااانت دخخخخخخخخخلك شنننننننو اننننننا ججججججججججيت فففففففي ببببببيتكم

حاج علي:- كدي براحه يا جنيات ها جنا المقبوض ليكم منو

نعيم :- يا حاج الناس كان عندهم واحد قابضنو بجيبو بيبسيي

ود ام زين :- اااااااااااااااااانت ممممممما بتتتتتتتتتتفهم

حاج علي :- مقبوض يعني بطنو موجعاهو فهمت يا جنا اصلو ناس الحلة ديل ما بشترو البيبسي دا الا لما يكون واحد عندو قبضه فهمت كدا وتعال يا جنا الدنيا رمضان لزوم البيبسي شنو؟

ود ام زين :- اخخخخخخخخخخ

نعيم :- يا ولد يا قليل ادب امشي تف بعيد

ود ام زين :- دقققققققققققيقققققه اخخخخخخخخخخخخخ

نعيم والله ما تمرق اقوم اظعمطك

حاج علي :- خليهو يتم كلامو ونعرف منو الحاصل لزوم البيبسي شنو في رمضان

ود ام زين :- ققققققلت للللللليييييييككككككم اخخخخخخخخخخوي ججججججججججججج

نعيم :- اخوك جيعان اخوك جرسه اخوك جرى اخوك شنو قول نشفت ريقنا

ود ام زين مسك الدفتر وكتب لحاج علي انو اخوهو جا من الخارج

حاج علي :- والله حق البيبسي ما تدفعو اجر وقول لامك حمدا لله علي السلامه

نعيم :- مديهو الموية البارده مالك مجان اول مره تعملها يا حاج علي.

حاج علي :- انت ما عارف الحاصل اخوهم جا من الخارج وكدا بجيبوا لي قروشي العايزها منهم

نعيم:- عارفك ما بتدي حاجه ساي اها تم لي خبورات ناس الحله

حاج علي :- بعدين بتمها ليك كدي شيل السكر لخالتك وانا بمشي احمدن ليهم السلامه تعال لي بعدين

[size=6][size=18]نعيم شال السكر ومشى لخالتو خلينا في الحلقة الجاية نشوف البحصل شنو بين نعيم وخالتو خليكم متابعين
الى لقاء في الحلقة القادمة[/size][/size][/size]

الحلقــــــــــــــــــــــــــــ13ــــــــــــــة

[size=6]في نهاية الحلقة السابقة كان هذا الموقف........................ .......

حاج علي :- بعدين بتمها ليك كدي شيل السكر لخالتك وانا بمشي احمدن ليهم السلامه تعال لي بعدين

ننتقل اليوم الى بيت حاجه ام زين لنشوف كيف فرحانه بابنها المغترب الليهو كم سنة ما جا ونرتاح شوية من صاحبنا نعيم.

ام زين حاضنه ابنها وتبكي وتنوح وتقول :-والله يا ولدي قربت اعمى وراك لشنو بتطول مننا كدا ولا جواب ترسلو مع الجنيات البجو ناطين كل شهر ديل دحين ما عارف قلبي دا ما بستحمل وعارفني عيانه.كان رسلت لي الداهي الشايلنو الاولاد ديل ساي مالك كان اسمع صوتك ولا كان ظهرت في التلفزيون. والله انا قربت امشي للخرطوم وامشي محل بزيعوا الناس الغايبين بالسنين عشان تحن وتجيني .
كنت دايراك تلبسني الدهب واتفشخر بيهو متل بت كلتوم مليانه دهب راجلها كل شهر بجيب ليها التقيل كنت دايراك تجيب لي داك ياتوب الكرب اللابسنو النقاده والتلفزيون الا نمشي اخر الحله نحضر الناس البجيبوهم غايبين بنقول يمكن تجي معاهم, والله يا ولدي وراك شقينا واتبهدلنا وابوك من انت مشيت جاتو الرطوبه يوم يشتغل ويوم نايم في البيت والحمار الكنت مخليهو مات ساي لاننا ما بنعلق ليهو والكارو الكانت بتجيب لينا ربع اللحم اتكسرت والحمد لله في اخوك التمتام دا بمشي يبيع ليهو ليمون ومرات طماطم والله يا ولدي دي حالتنا وانت طووووولت خلاص
طبعاً ما مديه الولد نفس عشان يرد ليها .
لازالت حاجه ام زين حاضنه ولدها وتشكي ليهو حتى دخل ابنها التمتام الرسلتو للبيبسي كولا وليهو ساعتين في الشارع.ام زين :- مالك يا شافع اتاخرت كدا؟ ومالو البستي كولا شوية كدا ما تكون جغمت منو ؟

ود ام زين التمتام:- دددددددددددا مممممما انا؟

ام زين :- دا منو الشربو منك يشرب الحمت رمت وانت شايلو كدا قدام الناس ما كان تضاريهو الدنيا رمضان شحت الله الرمضه التشويك شوي.

التمتام :- ووووووووالله الششششششششفع اتتتتتلمممممموا فييييييني متتتتتتتتل النممممممل الفففففففي سكككككككر وختتتتتتتفووووهههههووووو مننننننني وكككككككل واااااحد شفففففط منننننو جغغغغغغغغممممه ( والله الشفع اتلموا فيني متل النمل الفي السكر وختفوهو مني وكل واحد شفط منو جغمه)

ام زين :- جيبو جاتك ام كلعلع.
ام زين رجعت تاني لولدها المغترب وبدت تنوح وتبكي وتشتكي ليهو في الزمن الصعب الخلاها تجر ( تدين) من حاج علي

في الحلقه القادمه المغترب حيحكي لامو عن الغربه خليكم متابعين

[/size]

14

المغترب :- يمه خلاص خلصتي مناحه انا الحين ( الان ) تعبات ابغى انام (عايز ينوم) لي كم يومين ما نمت راكب في الباخره وفي البص خليني انوم شوي ( شويه) وبعاود ( برجع ) اكلمك وااحكيلك السالفه ( القصه ).

ام زين:- والله يا ولدي ما فهمت منك حاجه لكن شكلك تعبان امشي اخد ليك راحة وانا بجهز ليك الاكل والله كان عندي قروش كنت ضبحت ليك عنبلوك ( عتود, تيس. ) لكن انت عارف الحاله.

المغترب:- يمه عليك الله ما تجيبي لي سيرة التيوس دي هنا انا مليت منهن انا بمشي اريح شوي وبجيك.
ام زين محتارة في الكلام بتاع ولدها الما عارفه ليهو اتجاه بعض الكلمات ما قدرت عليها بتاتاً وقالت الا تمشي تنادي ليهو بت كلتوم لانها بتعرف كلام ناس الخارج كدي النمشي ليها مسافة ما يصحى من النوم .
وطبعاً مشت لبت كلتوم ودار الحوار التالي:-

ام زين :- طيبين هوي كيف حالكم كويسين وكيفكم مع رمضان .

بت كلتوم :- وعليكم السلام اتفضلي لي جوه خشي اقعدي , سمعنا بي ولدكم قالوا جا من السفر والله فرحنا ليك لكن قلنا نمش ليكم بعد الفطور ونكون رويانين مويه عشان نجدع ليك كم زغروده نوري بيها الناس الدهيبات الفي يديني ديل ومالكم ما زغردتوا لي ولدكم الجية ما فرحتك بعد ما كنتي بتلفي وتندهي للشيوخ الليلة مالك اتبومتي كدا؟.

ام زين :- والله من شدة الفرحة ما قدرت اعمل اي حاجه بس قعدت ابكي وبعدين انا ريقي ناشف ما قدرت ازغرت والموية الباقيه في جوفي طلعتها دموع يا بنتي.

بت كلتوم :- اسا هو كيف بكون صاحي ولا نام ؟

ام زين :- والله خليتو قال داير ينوم وقلت اجيك تتكلمي معاهو .

بت كلتوم:- مالو ان شاء الله خير الحاصل عليهو شنو ما تقولي لي قال راجع؟!!

ام زين :- لا والله قال تاني نهائي ما بفكر في الرجوع لكن كلامو اتغير دايراك تجي تتونسي معاهو شوية عشان نفهم منو كلمة ولا كلمتين.

بت كلتوم :- والله انا اساساً حاجي ليهو لاني دايره اسالو من رجلي يمكن جاب لي معاهو شوية دهيبات.

ام زين :- دهيبات تاني بعد الشايلاهو في يدك دا ؟ اسا يدك دي تاعباك تعب شديد وما قادره تشيليها.

بت كلتوم :- قولي ما شاء الله . الدهب دا ولا حاجه بالنسبة للدهب الكان عندي لما كنت مع راجلي هناك لكن بعناهو عشان نشتري لينا حاجات البنيان.

ام زين:- انا بمشي على البيت لكن بعدين تعالي لينا.
بت كلتوم :- النبي تقعدي شويه

ام زين :- لالا ما بقدر تلقي النسوان ملن البيت ودعتك الله.
ام زين مشت للبيت ولقت حاج علي منتظرها هناك سلمت عليهو وقالت ليهو :- مرحب بيك يا حاج علي شرفتنا.

حاج علي :- والله قلت اجي احمدن ليك السلامه بركة الشفتي الولد كويس

ام زين :- الله يسلمك ويسلم اولادك بركة ربنا القادر ونبي الله الطاهر لكن جيتك بدري دي فيها حاجه ما اظنك بتجينا بالساهل والحنية الجديده ليك شنو كنت كل يوم بتشاكل في الولد الصغير لما بقى يخاف يترسل ليك وعملت لينا فضيحة في الحله ام زين بتجر مني وام زين بتجر مني.

حاج علي :- كدي خلينا من الجوطه وريني الولد ان شاء الله جا مرتاح من بلاد الغربه وان شاء الله جاب ليكم الشنط الكتار ؟

ام زين :- والله يا حاج ما بدس عليك شايفه لي شنيطه واحده التقول جاي من الديش ( الجيش)

15

في نهاية الحلقة السابقة كان هذا الموقف..................

ام زين :- والله يا حاج ما بدس عليك شايفه لي شنيطه واحده التقول جاي من الديش ( الجيش)

حاج علي :- ما تدسي علي انا سمعت لي خبر بقولوا جابوهو بالكارو من المظله والكارو مليانه.

ام زين :- هو يا حاج علي ما تطلع اشاعة ساي هي الكارو قدر شنو الولد ما شايلاهو تشيل ليها شنط وبعدين ناس فرنيب ما لاقيين ياكلو ياكلو ليهم حمار كارو هوي وتاني هوي اوعا تطلع اشاعات الولد جا من الغربه وما قادر يتكلم بجيب ليهو في كلام نحن ما بنعرفوا باقي لي اتعلم كلام ناس الخارج اصلو طول معاهم.

حاج علي :- كدي بيني وبينك ما رمى ليكم بقجه فيها حاجه ؟

ام زين :- والله من جا مشى على العنقريب وانجدع ما سامع الشخريب بتاعو ؟

حاج علي :- سامعو متل قدرة الفول ما شاء الله الولد جاي شبعان قالوا ليك هناك يقوموا مع صلاة المغرب يفطروا ويمشوا الشغل ولو شفتي الجداد رااااقد هبطرش ما متلنا هنا الواحد لو داير يضبح ليهو جداده الفريق كلوا بعرفو ساكي الجداده من حيطه لي حيطه .

ام زين :- شغل بالليل دحين الكهربا ما بتقطع عليهم؟

حاج علي :- والله يا حليلك كهربا بتاعت شنو البتقطع ما سمعتي حاج سليم قال مشى الحج كم يوم قاعد هناك ما شاف ليهو لمبة بترف تقولي لي بتقطع .

ام زين :- خلاص يا حاج علي بعد يقوم من النوم انا بشوف لو عندو قريشات والله طوالي بنسددك انت اول واحد.

حاج علي :- خلاص ما مشكله لي بعدين بنجي نكرم بعد الفطور .

طبعاً المغترب نايم نوم السنين التقول عينو قبل كدا ما شافت النوم برغم السخانه البتشوي شي الجمر برضو مستحمل ونايم واخيراً قام مفزوع اكيد حنعرف ليه قام مفزوع خليكم متابعين.

المغترب :- يمه ايش لونك؟
ام زين :- يا ولدي انت عندك ضربة شمس ولا شنو انت ما شايفني انا امك الواحده دي ولوني ما اتغير من قمت ياهو دا لوني انت اللونك اتغير واتحومرت كدا وتعال النسعلك كلامك مالو اتغير كدا اتعلمت كلام ناس الخارج وجيت لكن انا ناس الحلة كلموني قالوا لي ما تخافي كل الجنيات البجو جداد من الخارج لسانهم بتعوج اول كنت خايف عليك ورسلت لبت كلتوم قالوا قبل كدا كانت هناك مع راجلا قلت تجي تتفاهم معاك واخوانك يبكوا قالوا دا ما اخونا الكنا منتظرنوا من زمان.

المغترب :- يا يمه انتي ما عارفه الحاصل ساي بس شغاله من قبيل تتكلمي لكن لو عرفتي غربتنا الما هنتنا بتعرفي ولدك كان بجاهد عديل كدا.

ام زين :- خشيت الديش انا من شفت شنيطك دي قلبي عرف كنت بتجاهد ما كنت في الغربه كنت بتكضب علينا ساي.

المغترب :- يمه كدي اصبري شويه النفهمك انا كنت هناك في الغربه الغريبه وبحكي ليك الحصل شنو من قمت من هنا لما وصلت واشتغلت وجيتكم راجع بس شيلي الصبر.

نواااااااااااااااااااصل[/size]

[size=6]في نهاية الحلقة السابقة كان هذا الموقف.......................

المغترب :- يمه كدي اصبري شويه النفهمك انا كنت هناك في الغربه الغريبه وبحكي ليك الحصل شنو من قمت من هنا لما وصلت واشتغلت وجيتكم راجع بس شيلي الصبر.

ام ام زين :- يا ولدي انا قلبي صبر راجيك سبعه سنين يلا ورينا الحصل ليك شنو؟

المغترب:- اسا انتي من الصباح بتغني توب الكرب الجابو النقاده ودهب الخزانه وشبشب السلم سلم نايلو والعتبة قزاز وسلسل الدهب البفك الكرب ويا خاتم المنى . انتي اصبري لي النوريك الحاصل كامل وبعدين اقعدي غني .

المغترب بدأ يحكي بحرقة عن الحصل ليهو هناااااااااك في بلد الغربه أول شئ يا يمه انا من قمت من هنا ركبت اللوري وصلني البندر ( العاصمه ) وصلت الفجر ما لقيت في السوق الشعبي الا الناس البتنوم في البصات ويادوب ستتات الشاي بولعن في النار انتظرت البصات لما جات ومشيت رفعت بقجتي وجيت شربت لي كباية شب شاي احمر وتاني واحده بتاعت لبن واكلت لي صحن بتاع لقيمات واتوكلت على الله وركبت البص وفرد نومه لما وصلنا الحصاحيصا البص وقف هناك شال ليهو كم واحد ومشينا تاني وقفنا في مدني برضو شال ليهو كم واحد وتاني شخرت ما صحيت الا في القضارف نزلنا ضربنا لينا دخن لان اكل البص ما نفع معانا وتاني نمت ما صحيت الا في سواكن دخلونا في اوضه قدر التكل بتاعنا دا قالوا دا فندق وما شفتي نزلت عطشان وداهمت ليك الماسوره واقعد اكرتع ما احس ليك الا بالملح مالي بطني اخدت لي نومه لما قمت لقيت بقجتي الكديس قطعها ليك قطع لاني شايل فيها باقي اللقيمات وباقي لحيمات كدا من البص ولو شفتي الكديس في سواكن تحلفي تقولي دا عتود.اها مشينا على الباخره ما تفتكري الباخره البجيبوها في التلفزيون ديك لالا دي التقول بنطون كبير شكلها غريب خشينا فيها لقينا الناس تفور فوران في البلعب كتشينه وفي البغني وفي كم عروس ماشات لرجالن غايتو جنس جوطه اها الباخره قامت بينا ماشه بينا قريب تسعة ساعات الاضنين صنن والبطن اتلخبطت الاكلنا داك كلو مرق والاكل جوه قالوا بالعمله الصعبه وانا ما عندي الا باقي من ست الشاي الفي سواكن.

المغترب بعاين لامو ولقاها تبكي مالك يا يمه بتبكي .

ام زين :- والله يا ولدي بكيتني دا كل الحصل ليك؟

المغترب:- هههههههههه والله دا ولا جزء من الحصل لي حاجات كتيره تشيب الراس كدي النصلي وارجع اتم ليك

[color:f30d=FF0000]نواااااااااصل[/size]

[size=6]في هذه الحلقة ننتقل الى نعيم وخالته , طولنا من نعيم لان المغترب اخد مننا كتير لكن حنرجع للمغترب في الحلقات القادمة ليكشف لنا اسرار الاغتراب.

نعيم شايل السكر وماشي لخالتو وفي الطريق يفكر في حيلة لكشف انها صايمه ولا فاطره وبدأ يوسوس مع نفسو ويقول ياربي اعمل شنو ياخي انا مالي ومالها تصوم ولا تفطر كيف مالي لالا لازم اعرف لان رمضان ماشي مسحن ممكن يوم افطر ودا الحيحصل طيب بستفيد شنو؟ كيف بتستفيد شنو لما تكش انها فاطره وفي العمر دا بتكون ليك نظام حماية لما انت تفطر والله فكره لكن الحيله شنو احسن اعمليها كم قصة كدا واجيب ليك راسها .لالالالالا دي راسها ناشف والحيله ما بتنفع معاها ياربي يا ربي يا ربي اعمل شنو والله مافي حل غير اكضب عليها كم كضبه كدا واشوف البحصل شنو تاني لالالا الكضب حرام ولكن برضو هي فاطره برضو حرام انا ما معتبرو كضب بس نظام حيله.

نعيم دخل لبيت خالته وسلم السلام عليكم.

الخاله :- وعليكم السلاااااااااااام وينك يا ولد ليك كم ساعه انا منتظراك؟

نعيم :- دكان حاج علي لقيتو زحمة شويه وقعدت . ومالك مستعجله السكر دايره بيهو شنو اسا.

الخاله :- بدور اسوي الموية من اسا لان التلاجه بتاعتنا ما بتبرد سريع

نعيم :- موية ولا عكاره قالوا العكارة ما بتتعرف يعني البشوفك بقول بتلخي ليك في عجين

الخاله:- عكارة شنو يعكر دمك بركة شيخي الامين سيد القبب.

نعيم :- انتي عارفه انا اتاخرت لشنو .

الخاله : ما قلت زحمة .

نعيم :- مافي زحمة ولا حاجه اسا انتي بتصدقي تكون في زحمة في دكان حاج علي

الخاله:- كيفن ما بصدق الناس كلها بتجر من حاج علي وهو غير الجروره باقيلك بشتغل اها قول الاخرك شنو؟

نعيم :- والله بدت تقع براها اها الليليه ببقى مؤلف عديل كدا. اها ما قلت ليك قالوا في واحده اخر الحله طلقوها.

الخاله :- اجي اجي دي منو دي .

نعيم :- ما عارف لكن سامع النسوان في الدكان بتكلمن قالوا طلقوها بالتلاته يعني بلا رجعه

الخاله :- والسبب شنو؟

نعيم :- قالوا كانت فاطره بالدس من زوجها

الخاله :- ممكن عندها عزر؟

نعيم :- زوجها عارفها قال ما عندها حاجه قامت من الصباح واتلاهمت الشاي والموية قالوا طبعها كدا متجرسه خلاص.الناس اتدخلت وقالوا لزوجها ياخي كان تستر الولية دي قال ليهم هي فاطره وكمان بتكضب لو اعترفت من الاول ما فيها حاجه .

الخاله :- والله رجال الزمن ديل دايرين ليهم سبب ساي.

نعيم :- والله ما من الرجال منكن انتن براكن بتسونها في نفسكن اسا لو اعترفت فيها شنو كان تكلمو تقول ليهو انا فاطره؟

الخاله :- ولشنو تكلمو

نعيم :- لو عارفها فاطره كان بشغلها في البيت اكتر لكن انا سمعت انو قام من الصباح ملأ الازيار ودخل العناقريب قال احسن يساعدها لان اليوم شكلو حيكون سخن وكل ما يقول ليها اعملي حاجه تقول ليهو صايمه وفي النهاية كشف ليك اللعبة بتاعتها واداها تلاته طلقات بلا رجعه.

الخاله :- والله متحيل ساي الراجل دا
نعيم :- يا خاله احسن تعترفي ساي لو فاطره.

الخاله :- انا البفطرني شنو واعترف لشنو الحمد لله انا من قمت صغيره علموني الصوم والحمد لله راجلي راجل تمام بسدها ويقدها.

نعيم :- والله ما طمني نفسك ساي انا بقول ليك لو يعني حصل يوم دايره تفطري كلمي ناس البيت او كلمي راجلك.

الخاله :- انت بتلف وتدور مالك ؟

نعيم :- لا مافي حاجه

نعيم والله الكلام دا شكلو خافت منو لكن برضو ما اعترفت من الاحسن امشي افتش الروب الداساهو مني واشوف لي حيلة تاني . بس لقيتها النعمل فيها شايف لي فار واقوم افتش الحلل والكورات ديل اشوف كان ما لقيت الروب بتكون فاطره وكان لقيتها فاطره طوالي بفطر .

نعيم :- زحي زحي زحي يا خاله.

الخاله :- مالك يا جنا؟

نعيم :- فار كبير

الخاله :- ما عندنا فيران غيرك

نعيم بدا يفتح في الدواليب وتحت العناقريب وفوق الرفوف حتى المشلعيب حصلو ما فضل محل ما فتشو

الخاله :- يا جنا حيرتني والله فار شنو البتفتش ليهو قلبت علي المكان كلو

نعيم:- الفار دا جقر كبير قالوا بسمم كان ما لقيتو الليله ما برتاح كدي افتحي لي التلاجه دي

الخاله :- والله قصتك عجيبه فار شنو البخش التلاجه

نعيم :- هو بخش البطن غالبو يخش التلاجه ( طبعاً قاصد الروب )

نعيم فتش حتى التلاجه ما لقى حاجه قال احسن يسالها ساي عن الروب الجابتو الصباح من دكان حاج علي

نعيم :- يا خاله خليك واضحه معاي انا ريقي نشف وتعبت خلاص في النهاية كدا بسال من الروب الجبتيهو الصباح من الدكان وكان شربتيهو وفطرتي انا زاتي بفطر لانك انتي الكبيره لما تكوني فاطره نحن الصغار برضو بنفطر لانا اتعلمنا ما ناكل قبل الناس الكبار والناس الكبار لما يكونوا فاطرين برضو بنفطر اها رايك شنو؟

الخاله مسكت المقشاشه وادت نعيم جلده عمرو ما ضاق زيها ومسكتو من اضنينو وطلعتو في راس التكل وقالت ليهو:- شوف الفوق داك شنو

نعيم :- فكيني خلاص شفت دي حله

الخاله :- افتش الحله شوف فيها شنو؟

نعيم :- فيها روب لكن خاتاهو فوق راس التكل لشنو؟

الخاله :- عشان يروب اصلو جبتو فطير الصباح وقلت اختو في الشمش شوية.

هنا نعيم اكتشف انو خالتو ما شربت الروب وان حاج علي غش عليهو عشان يزحلقو لان نعيم كلامو ما بندار كلامو كلو في الاكل والشراب والدنيا رمضان

نواااااااااااااااصل[/size]

بعد ما نعيم ادوهو دقه جامده فك البيرق ومسك العراقي في سنونو وبدا يطنطن .....اسا انا كان ما ساي بصدق حاج علي وانا عارف خالتي دي من غير رمضان بتصوم لكن تقولوا شنو اها اودي وشي وين منها وانا زاتي شقيان شقاوه عجيبه البوديني ليها شنو؟ لكن البيت ما بتقعد مع اخواني المشلضمين ديل والله كان قعدت دقيقه في البيت الا افطر والمشكله الكبيره في جيرانا الليل والنهار ريحة الاكل طاقه وخليهم جيرانا دا الفريق كلو شغال يسوي في الاكل في البعملوا في البليله وفي البحمروا في البصله وحاجات كتيره تخلي المصارين ادقشن انا ما عارف امشي وين زاتو , حقو امشي اشاكل عمكم حاج علي لالا بكرة رمضان بمشي وبجي اشيل منو الطحنية والبيبسي احسن اعمل معاهو صحبه , والله الصحبه معاهو ما نافعه غير المراسيل ما عندو حاجه كدي النمشي اقعد معاهو شويه .

نعيم :- السلام عليك يا حاج علي الكضاب

حاج علي :- انا كضاب يا مسخوت انا متل ابوك

نعيم :- والله ابوي ما كضاب زيك

حاج علي :- مالك زعلان وعراقيك مشرط كدا انت يا نعيم خلاص كبرت وبقيت راجل مافي داعي للمشاكل اسا الدقاك منو
نعيم:- نعيم مافي زول دقه دقه روحو برا شنو يعني الدقاني منو دقيتني انت بي كضبك دا تقول لي امشي شوف خالتك فاطره

حاج علي :- ما علينا كدي تعال ادينا كضم كضمين خلينا نكسر الوقت الطويل دا

اثناء الحوار البينهم بنات الفريق ملن الدكان وقعدن يشترن ويتكلمن بصوت عالي

زينب :- يا حاج علي دايره لي صابونة وش.

حاج علي:- والله وشك دا ما ببقى ابيض كان سكنتي في المصنع زاتو هاكي لكن داير حقي كااااش

علويه:- هاك يا حاج علي اديني انا فازلين.

حاج علي :- الفازلين شن بدوريبو كركاركم كمل خلاص ؟

فاطنه :- اديني يا حاج انا مستعجله

حاج علي :- اها انتي دايره شنو؟

فاطنه :- بدور مشط كبير.

حاج علي :- زمان بتسرحي بخلال اخوك ابتفه الليله جيتي دايره مشط

حليمه :- دايره لي سفنجه مقاس 12

حاج علي :- مقاسك عارفو و12 ما بقضيك الا تتميهو بي بالنعال القديمه وين البرطوش بتاعك و الزوزو و الشده البتمرقي بيهن للبكيات

طبعاً نعيم راسو ضرب اسمع يا حاج علي الحكاية شنو بكرة العيد ولا شنو

حاج علي :- عندهن غرض وانا عارفو.

نعيم :- والله حكاية عجيبه بنات الحله جت لافات بي جاي ولا بسات الملون شئ اخدر وشئ احمر وشئ اصفر زي التقول في مولد يا حاج علي فهمنا الحاصل شنو الليله نضيفات ساي وبشترن في الصابون والمشط والنعلات والفازلين يا حليل كركانا الصافي ويا حليل الودك المافي اسا الودك دا احسن منو في يا حاج ولا الكركار الريحتو تشمها من بداية الفريق يا حليل زمنكم يا حاج اها قول لي الحاصل شنو؟

حاج علي :- انت ما عارف؟

نعيم :- اول مره اكون مسطح الدقه حاره خلتني ما بفكر زاتو

حاج علي :- انت ما عارف ود ام زين جا من الخارج؟

نعيم :.- عارفو لكن لي شنو البنات ديل بتلبسن كدا

حاج علي :- ههههههههه عييييك يا نعيم الجنا قالوا داير يعرس عشان كدا البنات بتسمحن وبمشن يلمن عليهو

نواااااااااااااااااال[/size]

ننتقل لبيت ام زين لنشوف لمة البنوت هناك وكيف حيقابلن المغترب.

ام زين :- اها يا ولدي تم لينا الحكاية كيف وصلت هناك وان شاء الله تكون زرت بيت الله وزرت قبر الرسول صلى الله عليه وسلم

المغترب:- يمه اصبري بتم ليك لكن شوية شويه يمه من جيت ما قادر ارتاح خلاص بعدين اسا انا سامع لي صوت ناس ما شيين علينا

ام زين :- اآآي ديل بنوت الفريق اتلمن وجنك يسلمن عليك خليك نجيض واختار ليك واحده فيهن وما شاء الله عليهن نجيضات عواسات وفراكات الواحده تلقاها قاعده في المنقد من الصباح تسوي الشاي والفطور وتسوي قهوة الضحوية وتسوي ملاح الغداء وتغسل ما شاء الله لا بتكل ولا بتمل اذا انت ما بتعرف تختار انا بختار ليك لكن بختار ليك المواصفات البتنفع معانا

المغترب:- يمه اسكتي اسكتي البنات داخلات علينا.

ام زين :- اتفضلن يا بنوت خشن لي جوه تعالن سلمن علي الولد قاعد بي جاي

زينب :- ازيك حمدا لله على سلامتك

المغترب :- الله يسلمك لكن ما عرفتك

زينب:- انا زينب جارتكم اخت احمد

المغترب :- ما شاء الله كبرتي وبقيتي عروس والله خليتكم صغار بتلعبن بام لعاب وبالكار وبي اركه عميه اتفضلي خشي لي جوة

حليمه :- ازيك ان شاء الله تكون عرفتني؟

المغترب :- ما عرفتك والله انتي هيل منو؟

حليمه :- انا بت حاجه عشه نسيتني ولا شنو نسيت لما كنت بدقنا .

المغترب :- والله كبرتن خلاص .

طبعاً بنات الفريق كلهن اتلمن ويعرفن في اساميهن واحده ورا واحده ويبحلقن ويتكلمن تحت تحت...ما شاء الله عليهو سفتنو جا كيف لونو دا اتغير ما شفتي كلامو غريب شويه يا خيتي ديل المغتربين زي حلاوة قطن اسي بهبد اديهو يوم يومين