كلنا مشينا بيوت اعراس واتحننا ورقصنا وحضرنا الجرتق ....
بس مافى زول سأل نفسو يعنى شنو جرتق او ليه وكيف ومتين؟
صدق او لا تصدق
صينية الجرتق خليط من اربعة او خمسة حضارات وديانات ....
واثبات ان انسان السودان اروع ما يكون فى تجاوبو مع الاخر وقبولو...
الي رحاب الجرتق :
مكونات الجرتق ....
1/ عنقريب :
وهو معروف للكل ( سرير من الخشب منسوج بألياف نباتية)
2/ البرش :
وهو مفرش يصنع من سعف النخل وله عدة استعمالات
3/ الصينية :
وتكون بها طلاسم ورموز يغلب عليها اللون الاحمر كما سنوضح فيما بعد
* بداخل الصينية يوجد الاتى:
1/ المبخر:
ويكون البخور المستعمل التيمان المسبع للحسد، والصندل لتعطير المكان
2/ صحن الباشرى:
ويكون عادة من الفخار المحروق زو اللون الاحمر او اقرب للبنى الفاتح وهو الذى تعجن فيه الحناء
3/ الحق:
ويكون اكثر من واحد وهو الاعجاز السودانى الخالص فهو مصنوع من خشب ليست لهو مسام مما يحفظ العطور المصنعة محليا لاطول فترة ممكنة مثل:
ا/ الدلكة وتصنع من دقيق الذرة وبعض الزيوت العطرية :
ب/ الضريره وهى مخلوط لعدة عطور ومسك توضع على رأس العريس
ج/ كما توضع فيه كل انواع البخور
4/ الشموع :
وتكون موضوعة فى صحن الباشري ( زى مافى الطورطة يا ناس الشهادة العربية)
ملحـــــــــقات :1/
1/ الهلال الذهبى : يكون موضوع فى قطعة حرير احمر ويربط فى راس العريس
2/ الفقرة الاخيرة من العمود الفقرى لسمك ( القرقور)
3/ الخرزة الزرقاء وتربط فى يد العريس بخيوط من الحرير الاحمر
4/ سوط العنج
5/ السيف
فى واحد ممكن يقول طيب ووين الحاجة الغريبة نحنا عارفين دا كلو...
طيب يله نشوف من البداية ... وكيف الصينية دي جمعة كل الحضارت والديانات ...
والدليل شنو ....؟؟؟؟
لحضارة الفرعونية:
*صحن الباشرى اصلا مصنوع من الفخار والفخار اكتشاف فرعونى وله الكثير من الاساطير فى المعتقدات الفرعونية فهو طين يحرق فيصير فخار رمزية لخروج الشئ من الشئ وكذا الزواج...
اللا دينى / الوثنية:
* استعمال اللون الاحمر بأفراط مما يطرد الارواح الشريرة او ارواح الاسلاف فهو اللون المضاد للشر فى الوثنية او اللا دين ...
وكان ذلك لصعوبة استخلاصة من الطبيعة...
ولنفس السبب استعمل فى القرون الوسطى كممر او ممشى للرؤساء و الزعماء لانه شديد القيمة والغلاء.
الديانة المسيحية :
لم ترتبط الشموع بأحتفالات الزواج او الوفاة او كطقس دينى الا فى الديانة المسيحية...
وارجح ان تكون دخلت للمجتمع من خلال الدخول المسيحى القوي فى الشمال عن طريق دنقلا العجوز التى كانت تحوى اقدم الكنائس فى افريفيا
بعد كنيسة- سانت كاترين- بمصر ودولة سوبا
الحضارة الاغريقية:
وترمز لها هنا فقرة سمك (القرور) فاالحضارة الوحيدة التى عبدة الاسماك كانو الاغريق لارتباطهم بالبحر....
بل وقدسوها جدا ...
وتحديدا الفقرة الاخيرة لماذا ؟؟؟
لانها كانت ترمز للخصوبة عند الاغريق
الحضارة العربية:
دخلت هنا من خلال الخرزة الزرقاء وتسمى عند العرب ( القرزوحلة) بضم الراء والحاء فكن نساء العرب قديما يقلن
( اخذته بالقرزوحلة بالليل رجل ، وبالنهار امة).
يعنى بصراحة بتحكم بيها المرا راجله فما تلبسوها بعدين ياشاب انا وريييييتكم.
*الديانة الاسلامية:
ورمزها واضح الهلال المذهب ولا اظن انه يحتاج للشرح فهو الرمز الاسلامى الاوحد ..
*اما سوط العنج وواضح من اسمه انه للملكة العنج قديما فى سنار فهو لاظهار قوة العريس وادخال الرهبة فى نفس العروس رمذا لقوة الشخصية ...
والسيف رمزية لاستعداد العريس ان يفدى العروس بروحة ويحميها
موضوع جميل لقيتو وحبيت انقلو ليكم
وتسلمووووووووووو
