بلادي انا
بلاد ناسا في اول شئ
مواريثهم كتاب الله
وخيل مشدود
وسيف مسنون حداه درع
وتقاقيبهم تسرج الليل مع الحيران
وشيخا في الخلاوي ورع
وكم نخلات تهبهب فوق جروف الساب
وبقرة حلوبة تتفرع وليها ضرع
وساقية تصحي الليل مع الفجراوى
يبكىالليل ويدلق في جداولو دمع
يخدر في بلادي سلام
خدرة شاربي موية النيل
تزرد في البوادي زرع
بلادي انا بتشيل الناس وكل الناس
وساع بخير ها لينا يسع
وتدفق مياه النيل علي الوديان
بيضاض الفضة في وهج الهجير بتشع
بلادي سهول بلادي حقول
بلادي الجنة للشافوها او للبرة بيها سمع
بلادي انا بلاد ناسا تكر م الضيف
وحتى الطير يجيها جيعان
ومن اطراف تقيها شبع
بلادي الصفقة والطنبور
وبنوتا تحاكي الخيل
يشابن زيي جدي الريل
وشبالن مكنن في طريفو ودع
بلادي امان بلادي حنان
وناسها حنان يكفكفوا دمعة المفجوع
يبدوا الغير علي ذاتهم
يقسمو ا اللقمة بيناتهم
ويدوا الزاد حتى ان كان مصير هم جوع
يحبوا الدار
يموتو ا عشان حقوق الجار
ويخوضوا النار عشان فد دمعة
وكيف الحال كان شافوها
سايلة دموع ......
ديل اهلي
البقيف في الدارة
وسط الدارة
واتنبر واقول للدنيا ديل اهلي
عرب ممزوجة بي دم الزنوج الحارة
ديل اهلي
ديلي قبيلتي لما ادور افصل للبدور فصلي
اسياد قلبي والاحساس
وسافر في بحار شوقم زمان عقلي
اقول بعضى
الاقيهم تسربوا في مسارب الروح بقو كلى
محل قبلت القاهم معايا معايا زي ضلى
لو ما جيت من زي ديل
كان اسفاي
واما ساتي
واذلي
تصور كيف يكون الحال
لو ما كانت سوداني واهل الحارة ما اهلي
تصور كيف
