عــرس الكـــوره

قادني لكتابة هذا الموضوع تكاليف الزواج الباهرة في هذا الزمن وكثرة هذه التكاليف تولد العنوسة في المجتمع .لذا جاء عرس الكوره في فترة المهديه وسميه عرس الكوره لبساطته يعني متل الحاجه الجايبنها ليك في كوره والكوره تعني الماعون متل الصحون وغيرها ومن ضمن التسهيلات كانت الوليمة بشاة واحده او بلح لاغير وكانت في عقوبة لمن يتعدى هذه الحدود ووردت اغاني كثيرة جداً من ضمن اغاني البنات في تلك الفترة ( ود المهدي ينصلح الضوقنا بوخة الطلح ) وكانت الفتاة في تلك الفترة سعيده جداً بعرس الكوره والبعض طبعاً وديل اقلية رافضة هذا الزواج البسيط وبعض البنات من الطبقات العاليه طلعوا اغنية( عرس الكوره عرس اليابه لا مضغوط ولا دبابه) المضغوط ما استحضر معناه ولكن الدبابه شبشب عالي .

الاخوة والاخوات لنناقش قضية غلاء المهور.

بالنسبه للاخوان هل انتم راضيين على غلاء المهور وقادرين ولو بعد حين لمجاراة المجتمع الذي يتباهى بالمهور والشنطه وغيرها؟

للاخوات هل حنقبلن بالزواج الميسر او عرس الكورة او الزواج الجماعي ام افضل البوبار والبايرات الكتار

بعض المعلومات مأخوذه من صحيفة الصحافه

ههههههههههه والله يامحمد نعيم حسي جد في ازمه لازم الواحد بعض مايتخرج يقعد يكون نفسه ولو
اتقدمت ادوك طلبات عمرك لو انت ماعندك حاجه حتعرسه الايام دي الشباب بقو يختصرو الموضوع

يمشي مع البنت من وراء اهلها ويتزوج وطبعا في بنات محافظات والحمد لله ممكن تستناك ولو ميت سنه لكن اهلها مابرضو الكلام ده

وطبعا السودانين الشيله والمهر والعرس وشهر العسل طبعا الناس العندهم قروش ماعندهم مشكله

لكن جد الشباب بعني من النقطه دي جدا جدا

ارجو ان العائلات الكريمه تكون خفيفه شويه تبطل الطلبات الكثيره دي

وشكرا ليك علي الموضوع ده

الاخ عمر مشكور على المرور

والان فعلا بقت مشكلة كبيرة جدا وانا بعرف ناس كتيره ما قادره تتزوج خوفا من الطلبات الكتيره دي وان ظروفهم قدر الحال

والله ربنا يسهل لي جميع الشباب والشابات ويخفف عليهم الطلبات هههههههههههههههههه

OMAR كتب:

والله ربنا يسهل لي جميع الشباب والشابات ويخفف عليهم الطلبات هههههههههههههههههه

المشكلة يا اخ عمر في البوبار او المظاهر هي الاساس وناس شوفوني ديل انا جبت كم ودا جاب كم وناس الشنطه 12 والريحة بالارطال حاجه مبالغه .

ان شاء الله يا اخ عمر الموضوع يتحل في عهدكم وتتيسر الامور